தெற்காசியாவில் மிகவும் சர்ச்சைக்குரிய நாடாக இருக்கும் பாகிஸ்தானில் எப்போதும் ராணுவத்தின் அதிகாரம் தான் தலைதூக்கி இருக்கும். இந்த நாடு சுதந்திரம் பெற்று 77 ஆண்டுகள் ஆகியுள்ளது.
இதுவரை ஆட்சிக் கட்டிலில் அமர்ந்தவர்கள் ஒன்று ராணுவத்தால் அங்கீகரிக்கப்பட்ட வேட்பாளர்களாக இருப்பர். இல்லையெனில் ராணுவமே ஆட்சிக் கட்டிலில் இருக்கும். இப்படி ஒரு சூழலில் 2024 நாடாளுமன்ற தேர்தலில் திருப்புமுனை ஏற்பட்டுள்ளது. முன்னதாக நவாஸ் ஷெரீப்பின் பாகிஸ்தான் முஸ்லீம் லீக்-நவாஸ், பிலாவல் சர்தாரி பூட்டோவின் பாகிஸ்தான் மக்கள் கட்சி ஆகியவை நேரடியாக போட்டியிட்டன.
முன்னாள் பிரதமர் இம்ரான் கான் ஊழல் வழக்கில் தண்டனை பெற்று சிறையில் அடைக்கப்பட்டார். இவரது அரசியல் கட்சியான பாகிஸ்தான் தெஹ்ரீக்-இ-இன்சாப் முடக்கப்பட்டது. இதனால் இக்கட்சி வேட்பாளர்கள் சுயேட்சையாக போட்டியிட்டனர். இந்த தேர்தலில் நவாஸ் ஷெரீப்பிற்கு ராணுவத்தின் ஆதரவு இருப்பதாக பேசப்பட்டது. இதனால் இவர் தான் பிரதமர் நாற்காலியில் அமருவார்.
இதற்கேற்ப தான் தேர்தல் முடிவுகள் வெளியாகும் என்று கூறினர். ஆனால் சுயேட்சையாக நின்ற பாகிஸ்தான் தெஹ்ரீக்-இ-இன்சாப் கட்சியின் சுயேட்சை வேட்பாளர்கள் 101 பேர் வெற்றி பெற்றுள்ளனர். இதையடுத்து நவாஸ் ஷெரீப்பின் பாகிஸ்தான் முஸ்லீம் லீக்-நவாஸ் 75 இடங்களும், பிலாவல் சர்தாரி பூட்டோவின் பாகிஸ்தான் மக்கள் கட்சி 54 இடங்களும் வென்றது.
மொத்தமுள்ள 266 இடங்களில் 253ல் மட்டும் முடிவுகள் அறிவிக்கப்பட்டுள்ளன. எஞ்சிய இடங்களில் எப்போது முடிவுகள் வெளியாகும் எனத் தெரியவில்லை. இந்நிலையில் நவாஸ் ஷெரீப், பிலாவல் பூட்டோ ஆகியோரின் கட்சிகள் இணைந்து ஆட்சி அமைக்க முயற்சி செய்து வருகிறது. ஆனால் இம்ரான் கான் கட்சியினர் போராட்டத்தில் ஈடுபட்டு வருகின்றனர்.
தங்களுக்கு தான் பெரும்பான்மை இருக்கிறது என்றும், தலைமை தேர்தல் ஆணையர் பதவி விலக வேண்டும் என்றும் கோரிக்கை விடுத்துள்ளனர். இதற்கிடையில் மற்ற இரு கட்சிகளும் தங்களுக்கு தான் பெரும்பான்மை இருக்கிறது என்றும், எஞ்சிய இடங்களில் வாக்கு எண்ணிக்கையை விரைவாக நிறைவு செய்ய வேண்டும் என்றும் வலியுறுத்தி உள்ளன. இதனால் பாகிஸ்தான் அரசியலில் பெரும் பரபரப்பு ஏற்பட்டுள்ளது.
இதில் கவனிக்க வேண்டிய விஷயம் என்னவென்றால் மறைமுகமாக பாகிஸ்தான் ராணுவம் ஒரு தேர்தலில் கூட தோல்வி அடைந்ததே இல்லை. ஆனால் தற்போது அது அரங்கேறி இருப்பதாகவே பார்க்கப்படுகிறது. இதன் காரணமாக கடந்த காலங்களை போல தற்போது நிலைமை இல்லை என்று ராணுவம் உணர வேண்டும்.
சுயமாக ஆட்சி நடக்க வாய்ப்பளிக்க வேண்டும் என்று சர்வதேச அளவில் அறிவுறுத்தப்பட்டு வருகிறது. மறுபுறம் பாகிஸ்தான் மக்கள் மத்தியில் இம்ரான் கானிற்கு பெரிய அளவில் செல்வாக்கு இருப்பது தெளிவாக தெரியவந்துள்ளது. கட்சி இல்லை, சின்னம் இல்லை, தலைவரும் வெளியில் இல்லை.
ஆனாலும் வெற்றி பெற்றிருக்கிறது என்றால், அவருக்கான ஆதரவு அலையை சாதாரணமாக எடை போட்டு விடக் கூடாது. ஆனால் பாகிஸ்தான் ராணுவம் சும்மா இருக்காது. நவாஸ் ஷெரீப்பிற்கு சாதகமான சூழலை ஏற்படுத்தக் கூடும். எப்படியும் நவாஸ் ஷெரீப் தலைமையில் கூட்டணி ஆட்சி அமையும் என்கின்றனர்.
ஆனாலும் இந்த தேர்தல் மூலம் பாகிஸ்தான் ராணுவத்தின் அரசியல் அதிகாரம் வலுவிழந்து விட்டது என்பது அம்பலமாகி இருக்கிறது. அதாவது ராணுவத்தின் அதிகாரம் பறிபோய் இருக்கிறது. இது பாகிஸ்தானில் உண்மையான ஜனநாயகம் மலர அடிகோலுமா என்பதைப் பொறுத்திருந்து தான் பார்க்க வேண்டும்!
