கேரளா மாநிலம், திருச்சூர் மாவட்டம், செவ்வெண்ணூர் வட்டத்தில், கேரளா அரசின் வேளாண் நிலையங்களில் இருந்து வந்த ஐம்பது விவசாயிகளுக்கு தளியில் உள்ள தென்னை வளர்ச்சி மையத்தில் தென்னை சாகுபடி உயர்தொழில் நுட்பங்கள் பற்றி ஒருநாள் பயிற்சியானது வேளாண்மை தொழில்நுட்ப மேலாண்மை முகமையின் மாநிலங்களுக்கு இடையேயான கண்டுணர் சுற்றுலா திட்டத்தின் மூலமாக அளிக்கப்பட்டது.
தென்னை வளர்ச்சி வாரியத்தின் மேலாளர் கு.ரகோத்தமன், தளி மகத்துவ மையத்தின் நோக்கம், செயல்பாடுகள், சாதனகைள் மற்றும் தென்னை வளர்ச்சி வாரியத்தின் பல்வேறு திட்டங்களாகிய பரப்பு விரிவாக்க திட்டம், தாய்நெற்று விதை தோட்டம் மற்றும் தென்னை நாற்றங்கால் அமைத்தல், மாதிரி செயல்விளக்க பண்ணை, அங்கக உரக்கூடம் அமைத்தல், மறுநடவு மற்றும் புத்துயில் ஊட்டல் தென்னைக்கான மற்றும் தென்னை மரம் ஏறும் தொழிலாளர்களுக்கான காப்பீடு திட்டங்கள், தென்னை தொழில்நுட்ப இயக்கத்தின் மூலமாக தென்னை சார்ந்த தொழில்முனைவோருக்கான திட்டங்கள் குறித்து தெளிவாக விளக்கி கூறினார்.
மேலும், சர்வதேச இந்திய மற்றும் தமிழ்நாடு அளவில் தென்னை பயிரின் இன்றைய நிலை, தென்னையில் ரகங்கள் மற்றும் தேர்வு, தென்னை பயிருக்கேற்ற மண் மற்றும் தட்பவெப்ப சூழ்நிலைகள், உயர்விளைச்சல் தென்னை ரகங்கள் மற்றும் வீரிய ஒட்டுக்கள் தென்னை சாகுபடியில் உழவியல் தொழில்நுட்பங்கள் தாய்மர தேர்வு, விதைக்காய்கள் தேர்வு, நாற்றங்கால் மேலாண்மை, இளந்தென்னங்கன்றுகள் பராமரித்தல், தென்னையில் ஊடுபயிர்கள், பல அடுக்கு பயிர்கள், கலப்பு பண்ணையம், ஒருங்கிணைந்த பண்ணையம் மற்றும் துல்லிய பண்ணையம் அமைத்தல், தென்னந்தோப்பில் பசுந்தாள் உரப்பயிர் வளர்ப்பு, தீவனபயிர் சாகுபடி, ஒருங்கிணைந்த பூச்சி, நோய், உரம் நீர் மற்றும் சத்து குறைபாடு மேலாண்மை, கலப்பின ரகம் தயாரித்தல், அறுவடை பின்செய் நேர்த்தி, மதிப்புக்கூட்டல், சந்தைப் படுத்துதல் மற்றும் ஏற்றுமதி வாய்ப்புகள் குறித்து விரிவாக எடுத்துரைத்தார்.
அனைத்து தென்னை உயர்சாகுபடி தொழில் நுட்பங்களும் செயல்முறை விளக்கம் செய்தும் காண்பிக்கப்பட்டது. மேலும் இப்பயிற்சியில் நானோ டிஏபி மற்றும் சாகரிக்கா கடற்பாசி உரம் முதலியவற்றை வேர்மூலம் தென்னைக்கு கொடுப்பதன் செயல் விளக்கத்தினை இப்போ களஅலுவலர் மாரியப்பன் எடுத்துரைத்தார்.
இப்பயிற்சியில் தென்னை மதிப்புக்கூட்டப்பட்ட பொருட்கள், தென்னை உயிர் உரங்கள், ஒட்டுண்ணிகள், இரை விழுங்கிகள், இயற்கை முறையில் தயாரிக்கப்பட்ட பூச்சி கொல்லிகள், விளக்குப்பொறி, இனக்கவர்ச்சிப் பொறி கண்காட்சியில் வைக்கப்பட்டு விளக்கி கூறப்பட்டது.
இந்நிகழ்ச்சியில் வேளாண் அலுவலர்கள் ரோஹித், ராஜேஷ், பிபின், எமிலி மற்றும் ஜெயன் உடனிருந்தனர்.
