ஆறுகளில் வேகமாகப் பரவி நீரின் இயல்பான ஓட்டத்தைப் பாதிக்கும் ஆகாயத்தாமரையை வெட்டி அகற்றும் வகையில், பேட்டரியில் இயங்கும் மிதக்கும் இயந்திரத்தின் மாதிரியை ஈரோடு வேளாளர் மெட்ரிக் மேல்நிலைப் பள்ளி 11-ம் வகுப்பு மாணவி பிரதக்ஷணா உருவாக்கியுள்ளார்.
நீரில் மிதக்கும் வகையில் வடிவமைக்கப்பட்டுள்ள இந்த இயந்திரத்தில் சுழலும் கத்திகள் பொருத்தப்பட்டுள்ளன. அவை நீரின் மேற்பரப்பில் படர்ந்துள்ள ஆகாயத்தாமரையை வெட்டி, வெட்டப்பட்ட தாவரங்களை இயந்திரத்தின் மேல்பகுதியில் உள்ள சேகரிப்புப் பகுதிக்கு கொண்டு செல்லும் வகையில் வடிவமைக்கப்பட்டுள்ளதாக மாணவி தெரிவித்தார்.
சேகரிக்கப்படும் ஆகாயத்தாமரையின் தண்டுகள் மற்றும் இலைகளை பல்வேறு வகைகளில் பயன்படுத்த முடியும் என்றும், அவற்றிலிருந்து மீத்தேன் வாயு தயாரித்தல், சில தோல் நோய்களுக்கான மருத்துவப் பயன்பாடு மற்றும் கால்நடைத் தீவனமாகப் பயன்படுத்துதல் உள்ளிட்ட சாத்தியக்கூறுகள் குறித்து தனது திட்டத்தில் ஆய்வு செய்துள்ளதாகவும் அவர் கூறினார்.
ஈரோடு மாவட்டத்தில் பவானி, காவிரி உள்ளிட்ட ஆறுகளின் சில பகுதிகளில் ஆகாயத்தாமரை அதிக அளவில் படர்ந்துள்ளதால் நீரின் இயல்பான ஓட்டம் பாதிக்கப்படுவதாக அவர் தெரிவித்தார். நகர்ப்புற கழிவுநீர் ஆறுகளில் கலப்பதே ஆகாயத்தாமரையின் வேகமான வளர்ச்சிக்கு முக்கிய காரணமாக இருப்பதாகவும் கூறினார்.
நீரின் மேற்பரப்பை ஆகாயத்தாமரை அடர்த்தியாக மூடுவதால் சூரியஒளி மற்றும் ஆக்சிஜன் நீருக்குள் செல்வது குறைவதுடன், கொசுக்கள் பெருகுவதற்கான சூழலும் உருவாகி, மக்களுக்கு பல்வேறு கொசுவால் பரவும் நோய்கள் ஏற்படும் அபாயம் உள்ளதாக அவர் தெரிவித்தார்.
ஆகாயத்தாமரையை அகற்றுவதற்கான இயந்திரவியல், ரசாயன மற்றும் உயிரியல் முறைகளை ஆய்வு செய்த பின்னர் இந்த இயந்திரத்தை உருவாக்கியதாகக் கூறிய பிரதக்ஷணா, மனிதர்கள் நேரடியாக நீரில் இறங்கி அகற்றுவது அதிக உழைப்பைத் தேவைப்படுத்தும் என்றும், ரசாயனங்களைப் பயன்படுத்துவது நீரின் தரத்தை பாதிக்கக்கூடும் என்றும் தெரிவித்தார்.
இந்த இயந்திரத்தை பெரிய அளவில் தயாரித்து ஆறுகள் மற்றும் நீர்நிலைகளில் பயன்படுத்துவதன் மூலம் ஆகாயத்தாமரையின் பரவலைக் கட்டுப்படுத்தி, நீரின் ஓட்டத்தை சீராக்க முடியும் என்றும் அவர் கூறினார்.
மேலும், ஆறுகளில் நகர்ப்புற கழிவுநீர் கலப்பதைத் தடுப்பதுடன், பொதுமக்களிடம் நீர் மாசுபாட்டைத் தடுப்பது குறித்த விழிப்புணர்வை ஏற்படுத்துவதும் ஆகாயத்தாமரை பிரச்னைக்கு நிரந்தரத் தீர்வாக அமையும் என மாணவி வலியுறுத்தினார்.
