திமுக வெற்றிக்கு காரணம் மு.க.ஸ்டாலின் தான். அவர் மட்டும் தான் காரணம் என்றால் அது மிகையல்ல.
கடந்த சில மாதங்களாக மு.க.ஸ்டாலினின் இடையறாத சுற்றுப்பயணம், மெய்வருத்தம் பாராத உழைப்பு, தளர்ச்சி இல்லாத முயற்சி, மக்களை சந்தித்த அணுகுமுறை, திட்டமிட்ட மேலாண்மை, மக்கள் மனதில் நம்பிக்கையை உருவாக்கும் வாக்குறுதிகள் எல்லாம் சேர்ந்து தான் இந்த முத்திரை பதிக்கும் வெற்றியை ஈட்டி தந்துள்ளது.
கொரோனாவின் உச்சத்தில் கடந்த ஆண்டு ஏப்ரல் முதல் “ஒன்றிணைவோம் வா” திட்டத்தின் மூலம் திமுக நிர்வாகிகள் தொண்டர்களை கொரோனாவால் பாதிக்கப்பட்ட மக்களை தேடி உதவிகள் வழங்க செய்தார்.
நம் துன்பத்தில் தேடி வருகிறார்களே என்று மு.க.ஸ்டாலின் மீது மக்களுக்கு இந்த உதவிகள் முழு நம்பிக்கையை கொடுத்தன.
தொடர்ந்து செப்டம்பர் மாதத்தில் “எல்லோரும் நம்முடன்” நவம்பர் மாதத்தில் “விடியலை நோக்கி ஸ்டாலின் குரல்” டிசம்பர் மாதத்தில் “ ஏன் அதிமுகவை நிராகரிக்கிறோம்“ இந்த ஆண்டு ஜனவரியில் “ உங்கள் தொகுதியில் ஸ்டாலின்” ஆகிய பெயர்களில் மு.க.ஸ்டாலின் நடத்திய பிரச்சாரங்கள் மக்கள் மனதில் ஆதரவை விதைத்தன.
ஆனால் ஆட்சி பொறுப்பை ஏற்றவுடனேயே அவருக்கு பெரும் பொறுப்பு காத்து நிற்கிறது. கொரோனா பரவல் அதிகமாக இருக்கும் நேரத்தில் அவருக்கு இது தான் பெரிய சவாலாக இருக்கும்.
18 வயதுக்கு மேற்பட்ட அனைவருக்கும் தடுப்பூசி போடும் மிகப்பெரிய பணிகள் அவருக்காக காத்திருக்கிறது. தமிழக அரசின் நிதி நிலையும் அடுத்த பெரும் சவாலாக இருக்கும்.
அவர் கடந்த ஏப்ரல் 3ம் தேதி நிருபர்களுக்கு அளித்த சிறப்பு பேட்டியில், நீங்கள் முதலமைச்சர் ஆனால் கையெழுத்திடப்போகும் முதல் ஆணை எதுவாக இருக்கும் என்ற கேள்விக்கு பதிலளிக்கும்போது உங்கள் தொகுதியில் ஸ்டாலின் சுற்றுப்பயணத்தின்போது நான் வாங்கியுள்ள மனுக்களுக்கு முதல் 100 நாட்களில் தீர்வு காண்பதற்கான ஒரு செயலாக்கத்துறையை அமைப்பது முதல் கையெழுத்தாகவும், முதல் அரசாணையாகவும் இருக்கும்.
தேர்தல் அறிக்கையில் அறிவித்த சில முத்தான திட்டங்களுக்கு குறிப்பாக குடும்பத் தலைவிக்கு மாதம்தோறும் ரூ.1000 நிதியுதவி, கொரோனா கால நிதியுதவியாக ரூ.4000 வழங்குவது போன்றவையாகவும் இருக்கும் என்று கூறியதெல்லாம் அவர் பதவியேற்ற அடுத்த சில நிமிடங்களில் நிறைவேறி மக்களை மகிழ்ச்சிக்கடலில் ஆழ்த்தும்.
மொத்தத்தில் திமுக பெற்ற வெற்றி என்பது ‘ஸ்டாலின் தான் வராரு! விடியல் தர போறாரு!’ அது தான், அது தான், மக்களுடைய முடிவு என்பது கூட.
